 |
مرض أحمد فهمي يقلق جمهوره تصدر اسم الفنان أحمد فهمي، مواقع التواصل الاجتماعي، وذلك بعدما كشف عن إجرائه عملية قلب مفتوح؛ مؤكدًا تغيير طريقة تفكيره ونظرته للحياة بعد هذه العملية. وقال الفنان أحمد فهمي خلال حلوله ضيفًا ببرنامج «كلام نواعم»: «دايما كنت باحب اهتم بجسمي جدا وأروح الجيم واكل كويس عشان صحتي، لكن في عام 2016 كنت أول مرة اشتغل مسلسل في شهر رمضان وأخلص قبل رمضان، متعود بنخلص تصوير في رمضان، المرة دي خلصت قبل شهر رمضان بكام يوم». وتابع :«أنا باحب الحلويات أوي ورمضان بقى كنافة وقطايف لقيت نفسي بازيد على الميزان قلت أروح للدكتور عشان أظبط الأكل، وهو بيكشف عليا عمل ريأكشن كده حاول ما يبينوش بس أنا فهمت، وطلب مني تحاليل وعملت التحاليل، ورجعت له قال لي إنت عندك حاجة في القلب». وأضاف فهمي :«قلت له إزاي عندي حاجة في القلب المفروض أحس بأعراض، قال لي محتاجين نكشف الأول، كشفت طلع فيه حاجة اسمها الصمام الميترالي عندي فيه قطع بسبب العصبية، سافرت وعملت عملية قلب مفتوح في إنجلترا، فجأة في اللحظة دي شفت الحياة بمنظور مختلف تماما». وتابع: «الدكتور وهو معايا دخلنا أوضة العمليات عشان يشرح لي قال لي السرير ده إنت ممكن بعد ساعتين تقوم وممكن لأ، بيتكلم عادي أنا ما أخدتش الكلمة إنها حاجة وحشة وأخدتها بطريقة إيجابية، بس من اللحظة دي بقيت باشوف الحياة بمنظور مخالف وإن الواحد بيدور على حاجات ممكن تكون مش مهمة نهائي في الحياة». وكشف النجم أحمد فهمي أنه يحاول علاج معاناته من العصبية، مشيرًا إلى أنه منذ أربع سنوات كان يتعالج عند مختص للقضاء على هذه العصبية، حيث قال: «أنا عندي إيجو وهوس بأفكاري الخاصة، وبالتالي لا أتقبل أي تصرف فيه تعالي من أي طرف آخر، وأنفجر من العصبية، والآن بدأت أعالج الأمر. - المصري اليوم |
